ILLUSTRIUM ALIQUOT VIRORUM EPITAPHIA. (Ex ms. codice monasterii Caritatis dioecesis Bisontinae, ordinis Cisterciensis.)

90 Epitaphium Ludovici Francorum regis, compositum a magistro Stephano, abbate Sanctae Genovesae Parisiensis.

(Hoc Epitaphium Ludovici, ut dicitur, VII, seu Junioris, refertur a Duchesnio tomo IV Rerum Francicarum, pag. 444, sed absque auctoris nomine.

Transit in haeredem pius ille prior Ludovicus,

Nomine, sede, fide, nec pietate minus.

Servula, tristis, inops aliquo sub rege. sub isto

Floruit Ecclesia, libera, laeta, potens.

1252C Rex humilis, rex pacificus, David, et Salomonem

Praetulit exemplo, seque suosque regens.

Quantum conjugii permisit copula, castus,

Quantum justitiae regula, mitis erat.

Jejunans, vigilans, orans, devotus ad omnes

Divini cultus, obsequiique modos.

Lingua preces vivas, lacrymas pia palpebra fudit,

Pauperibus solidos officiosa manus.

His meritis rapuit coelum violentia sancti

Raptus et a coelo te tibi terra refert.

1251 91 Versus magistri Symonis, cognomento Capra aurea, canonici Sancti Victoris Parisiensis summi et celerrimi versificatoris, quos composuit precibus comitis Henrici.

I. Epitaphium sancti Bernardi abbatis Claraevallis.

(Hoc Epitaphium editum est cum operibus sancti Bernardi, tacito nomine auctoris.)

Ecce latet Claraevallis clarissimus abbas,

1252C Qui summis summus, qui sibi parvus erat.

Religionis apex, lux mundi, laus monachorum,

Vox Verbi, pacis sanctio, juris amor.

Instructus, velox; sublimis, pauper, abundans,

Artibus, ingenio, sanguine, veste, bonis

1253A Laudis eget titulo, cujus laus non fit ad omnes,

Cujus honor, cujus crescere fama potest.

Hunc vero quem plangit adhuc, quem praedicat orbis,

Si laudare velim, laus mea laude caret.

Dura, malum, cunctos, tulit, horruit, aedificavit,

Vana, Deum, requiem, sprevit, amavit, habet.

II. Item ejusdem versus de episcopo Autisiodorense Hugone, quondam abbate Pontiniaci.

EPITAPHIUM.

Autisiodori praesul praeclarus in orbe,

Mente polum scandens, membra reliquit humi.

Sensu, stirpe, bono, praestans, illustris, honestus.

Hugo, brevis, largus, nomine, voce, manu.

92 Et locuples, et inops, pauper sibi, dives egenis.

1253B Et nullis impar, et sibi nullus erat.

Hunc a justitiae norma revocare nequibant,

Obsequium, terror, gratia, dona, preces.

Sola triumphabat virtus pietatis in illo,

Cum post justitiam debuit esse pius.

Bis quinos Octobre dies claudente, dierum

Finem clausit, habens nunc sine fine diem.

III. Item ejusdem versus de abbate Sancti Dionysi. Sugerio.

Decidit Ecclesiae flos, gemma, corona, columna,

Vexillum, clypeus, galea, lumen, apex,

Abbas Sugerius, specimen virtutis et aequi,

Cum pietate gravis, cum gravitate pius.

Magnanimus, sapiens, facundus, largus, honestus,

1253C Judiciis praesens corpore, mente sibi.

Rex per eum caute rexit moderamina regni:

Ille regens regem, rex quasi regis erat.

Dumque moras ageret rex trans mare pluribus annis

Praefuit hic regno, regis agendo vices.

1254A Quae duo vix alius potuit sibi jungere, junxit,

Et probus ille viris, et bonus ille Deo.

Nobilis Ecclesiae decoravit, reppulit, auxit,

Sedem, damna, chorum, laude, vigore, viris

Cui rapuit lucem lux septima theophaniae,

Veram vera viro theophania dedit.

IV. 93 Item ejusdem versus de comite Theobaldo.

Transiit ille comes Theobaldus, clarus ubique,

Ecclesiae matris filius imo pater.

Magnus honore, potens armis, spectabilis ortu,

Mente sagax, verbis lucidus, ore decens.

Exiguis parvus, timidis ferus, asper iniquis,

Simplicibus simplex, omnibus omnis erat.

Laetis, pauperibus, monachis, aegrisque parabat

1254B Incessanter opem, munera, templa, domos.

Hujus erat servare bonos, punire nocentes,

Hujus erat juste vivere, justa loqui.

Omnes virtutes in eo lucere videres;

Certabantque simul mirificare virum.

Gallia nostra gemens, tanto viduata patrono,

Sicut eo stabat stante, jacente jacet.

Ergo dies decimus Jani fuit ultimus illi,

Cui Deus est melior millibus una dies.

V. Epitaphium Eugenii papae Romani.

Urbis et orbis honor, sed jam dolor Urbis et orbis,

Rector in orbe potens, pulvis in Urbe jacet.

Hoc in vase sacro, pia pleni gratia fontis,

Infudit gratis munera grata polo.

1254C Magne Deus, dare magna potens, per te fuit illi

Lingua docere fidem, rem dare docta manus.

Mores angelici, devotio, finis honestus

Hunc tibi dant famulum; da requiem famulo