DIPLOMATA DUO HUCUSQUE INEDITA.

I Hatto Trecensis episcopus, ad preces Hugonis Antissiodorensis episcopi et Bernardi Claraevallensis, monasterio Aremarensi ecclesiam de Clareio et ecclesiam de Follis concedit. (Intra an. 1132-1136.)

In nomine sanctae et individuae Trinitatis, ego HUGO, Dei gratia Antissiodorensis episcopus, et ego BERNARDUS, Claraevallensis abbas, omnibus Christi fidelibus.

Omnis qui est ex veritate libenter audit veritatem et perhibet testimonium veritati; eapropter universitati fidelium notificamus quod Hatto, venerabilis Trecensis episcopus, ad preces nostras et per manum nostram dedit Aremarensi monasterio ecclesiam de Clareio et ecclesiam de Follis, laudantibus Manasse de Villamauro, et Falcone, archidiaconis suis; et ut donum istud firmum illibatumque 1919C permaneat, praedictus episcopus et nos apostolico bonae memoriae domini Innocentii papae secundi munimine . . . . . . . . . . . . . . . . . . . . . . . . Ne vero tam manifesta veritas aliqua succedentium temporum vetustate vel muta. . . . . . . . . nostrae confirmare curavimus.

(Original en parchemin, sans date. Au dos est écrit: «De ecclesiis Clareii et de Follis donatio nobis facta.» Le sceau qui pendait, par double queue, en parchemin, manque. — Archives de l'Aube, fonds de Moutier Ancey).

II. Hatto Trecensis episcopus ad preces «bonae memoriae» Bernardi abbatis Claraevallensis ecclesiam Lusiniaci canonicis B. Lupi Trecensis concedit. (Anno 1143.)

Ego HATTO, Dei gratia Trecensis episcopus, 1919D notum fieri volo omnibus tam futuris quam praesentibus quod bonae memoriae domnus Bernardus, abbas Claraevallensis a nobis petiit quatenus ecclesiam Lusiniaci canonicis Beati Lupi Trecensis concederemus. Quem scilicet abbatem cum pro sua sanctitate in magna veneratione haberemus nihilque ei quod a nobis juste peteret omnino negare vellemus; praedictam ecclesiam supradictis canonicis, domno scilicet Everardo abbati caeterisque fratribus sub ejus regimine Deo famulantibus eorumque successoribus, salvo nostro episcopali jure, in perpetuum concessimus. Sed quia quidam miles nomine Galterus Piscator tertiam partem in minuta decima et in oblationibus quatuor majorum solemnitatum et in censu atrii antiquitus habuerat et usque ad nostrum tempus tenuerat, totum 1920B hoc vigore ecclesiasticae justitiae de manu ejusdem militis excussimus, et donum quod de caeteris in eadem ecclesia praedictis canonicis feceramus de hoc etiam supplere curavimus. Hoc autem tali modo factum est, quod praedicto abbati suisque successoribus capellanum qui eidem ecclesiae deserviat sive regularem seu saecularem eligere licebit. Qui cum idoneam personam elegerit, eam episcopo praesentabit, eidemque curam supradictae ecclesiae absque ulla contradictione episcopus praebebit. Isdem vero capellanus de his quae ad jus episcopale pertinent, scilicet de circadiis et synodis respondebit. Debet autem eadem ecclesia per singulos annos XVI denarios, octo videlicet in paschali synodo, octo vero in illa synodo quae in Septembri agitur; in tertio autem anno quinque solidos. His itaque a presbytero, qui in eadem ecclesia erit, sicut consuetudinis est, in generali synodo persolutis; de caetero isdem presbyter liber et ab omni 1920C exactionis genere absolutus permanebit. Hujus rei cooperator exstitit dilectus filius et archidiaconus noster Manasses de Villamauro, ad cujus curam eadem ecclesia spectabat. Quia ergo hoc donum quanto saniori intentione factum fuit, tanto majori sollicitudine ne aliqua in futuro calumnia quassaretur confirmari debuit. Idcirco nos praesens scriptum inde fieri voluimus quod non solum nostri sigilli impressione, sed etiam legitimarum personarum quarum nomina subsequuntur attestatione munitum reliquimus. Haec sunt ergo nomina testium, qui interfuerunt: Domnus Guido, abbas monasterii Aremarensis; domnus Theobaldus, abbas monasterii Dervensis; domnus Odo, praepositus Beati Petri; Manasses, archidiaconus de Rumillei; Gibuinus, cantor et archidiaconus; Stephanus de Venisiaco; Garnerus de Sancto Remigio, presbyteri canonici Beati Petri; Stephanus Lupus canonicus Beati Petri et sacerdos; Eustachius, Hilduinus de Paulibus; 1920D Angelmerus de Sezannia; Stephanus filius Girulfi; Milo de . . . . canonicus Beati Petri; Guido comes Jarrensis; domnus Helenus abbas de Arripathorio, Gaufridus de Peronia; Gaufridus Altisiodorensis; Gancherus de Firmitate, monachi de Claravalle.

Actum est hoc anno ab Incarnatione Domini nostri Jesu Christi MCXLIII, epacta XIII, concurrente IV, regnante Ludovico Francorum rege, Teobaldo in Tricassino comitatum administrante.

(Original en parchemin. Au dos est écrit: «Scriptura Hattonis episcopi de Ecclesia et minori decima de Lusiniaco,» et en caractères du XV^e siècle: «Lettre de la donation de l'église de Lusigny et des mesmes dismes.» Le sceau qui pendait, par double queue, manque. — Archives de l'Aube, fonds de Saint-Loup.)